لما تيجي تجهز مجموعة إعلانات لحملة دعاية مدفوعة، هتحتاج تختار:
المنتجات اللي عايز تروّج لها
الكلمات المفتاحية اللي العملاء بيكتبوها في البحث واللي عايز تظهر فيها
الحد الأقصى للمزايدة (Bid) اللي مستعد تدفعه مقابل كل نقرة على منتجك
ممكن يبقى عندك أكتر من مجموعة إعلانات في نفس الحملة، لكن إعدادات الحملة نفسها هي اللي بتاخد الأولوية على إعدادات مجموعة الإعلانات.
يعني مثلًا، لو حددت ميزانية يومية 200 جنيه على مستوى الحملة، و250 جنيه على مستوى مجموعة الإعلانات، اللي هيتنفذ فعليًا هو200 جنيه (نفس الكلام بينطبق على التواريخ).
قسّم مجموعات الإعلانات حسب نوعية المنتجات.
يعني لو عندك حملة في البلاك فرايداي، اعمل مجموعة إعلانات مخصوصة للإلكترونيات، ومجموعة تانية للكتب لو بتبيع النوعين.
المهم إنك تقسّم المنتجات كويس بين مجموعات الإعلانات علشان تبقى الكلمات المفتاحية مناسبة للمنتج، وكمان علشان تبقى قيمة المزايدة مناسبة.
قيمة المزايدة بتتغير بشكل كبير حسب نوع المنتج – مثلًا، طبيعي تدفع أكتر على إعلان لتلفزيون سامسونج ، مقارنة بإعلان لكتاب.
من الأفضل تعمل مجموعة إعلانات واحدة لكل فئة من المنتجات.
الخطوة 1: اختار الحملة الإعلانية
ادخل على صفحة “الدعاية المدفوعة” (Sponsored Products) في حسابك.
اضغط على اسم الحملة اللي عايز تضيف فيها مجموعة إعلانات جديدة.
الخطوة 2: أنشئ مجموعة إعلانات جديدة
في صفحة الحملة، اضغط على زر “Create ad group”.
الخطوة 3: اسم مجموعة الإعلانات
اكتب اسم واضح ومعبر للمجموعة، زي مثلاً: “أحذية الجري” أو “أدوات المطبخ – ستانلس ستيل”.
الخطوة 4: حدد الجدول الزمني (اختياري)
ممكن تختار تاريخ بداية للمجموعة (لو عايزها تبدأ غير تاريخ بداية الحملة).
وممكن كمان تحدد تاريخ انتهاء (لو مش حابب تسيبها شغالة لحد ما الحملة تخلص أو الميزانية تخلص).
الخطوة 5: حدد الميزانية (اختياري وغالبًا بتكون متورثة من الحملة)
اختار نوع الميزانية:
يومي (Daily): اللي هتصرفه المجموعة في اليوم (ضمن حدود ميزانية الحملة).
إجمالي (Lifetime): إجمالي اللي هيتصرف على المجموعة كلها (برضو ضمن ميزانية الحملة).
ممكن تدخل ميزانية مخصوصة للمجموعة، بس لازم تكون أقل من أو تساوي ميزانية الحملة.
الخطوة 6: ضيف المنتجات اللي عايز تروجها
في قسم “المنتجات”، ضيف المنتجات اللي هتشتغل عليها المجموعة:
تقدر تدور عليهم في الكتالوج وتختار.
أو تنسخ وتلصق أكواد الـSKU (حد أقصى 1000، كل كود في سطر لوحده).
الخطوة 7: كلمات مفتاحية (لو الحملة يدوية)
في قسم “الكلمات المفتاحية”، اكتب الكلمات اللي عايز تزايد عليها. كل كلمة في سطر جديد.
الخطوة 8: حدد الـCPC (تكلفة النقرة)
في قسم “Bidding”، اكتب أعلى سعر نقرة مستعد تدفعه للمنتجات اللي في المجموعة.
ملاحظة مهمة: لو اخترت CPC أقل من الحد الأدنى المطلوب، مش هيظهرلك Error، بس المجموعة مش هتشتغل.
الخطوة 9: انشر أو احفظ المجموعة
اضغط Create عشان تنشر المجموعة ويكون حالتها “نشطة”.
أو اضغط السهم جنب زر Create واختار Create as draft لو حابب تكمل الإعداد بعدين، وساعتها الحالة هتكون “غير نشطة”.
الخطوة 10: راجع مجموعة الإعلانات
المجموعة الجديدة هتظهر دلوقتي في صفحة الحملة، وتقدر تتابع الأداء وتعدل الإعدادات بسهولة من هناك.
